多多表情

2013年4月4日 星期四

2013年2月5天閃遊大阪の京都衹園

Day 2 : 12-Feb-13 (Tue) 陰/雨
離開銀閣寺後,約3點3就來到八坂神社,其實目的地是衹園,八坂神社只是路經而已







下午茶時間都到啦,但我地反而係搵地方食lunch,M君一向鍾意食鰻魚飯的,起初計劃是係京都站食,後來見時間都唔早,我諗住去衹園食鰻魚飯的話,咪順便逛一逛衹園,當去多個景點,而且橫掂原先計劃上午只去京都金銀2寺,下午奈良,現在唯有全日京都啦
花了點時間左搵右搵之下,終於撞入呢間衹おん松乃,呢個鐘數一D都唔多人,隔離枱的香港人亦差不多食完走人,所以我地變包場了



我倆分別叫了2個套餐,M君叫『松』,我叫『竹』,價錢唔算平,不過諗住M君既然愛吃鰻魚飯,比貴D食到好質素D都無所謂,而且又唔係餐餐食,但似乎今次得不到等價交換,不過口味和標準人人唔同,個人覺得好一般啦,所以咪覺得比較貴


店內有一小擺設,趁鰻魚飯未到就影下相啦


馬騮兵團 : 等我地都出來影張合照先,到此一食



 

食飽飯後就開始順到一遊,今日出巡的和服小姐又不多,我倆很快行個圈便閃人了


 
行完衹園都將近16:30,我倆便搭巴士回京都駅了,到達京都駅差不多17:15,見附近有間Yodobashi,M君當然發揮小宇宙精神,小小地半小時多的時間來個速看


不經不覺接近18:00天已黑晒


18:10 (京都) → 18:37 (大阪) 【特急サンダーバード34号】Pass包


到達大阪後就即時搭車去心齋橋,係心齋橋周圍逛下和睇下今晚食咩好呢,因為今晚約了朋友21:00齊齊會個面兼食宵夜,所以要早點食晚餐,要留翻D時間待消化後才可繼續食宵夜嘛

最後決定食炭火燒肉,就揀了呢間いぶりやき 七輪



進入店舖後就有一名中國生來招待我們,他十分有禮,還主動提議我地食放題,說相比散叫還可能便宜些都唔定,哈哈! 出奇地我地居然寧願散叫,放題任食都唔食,只因食lunch時間遲了,而且又約了朋友食宵夜,都係留下肚好些

首先叫了一個set,然後再叫多一碟香腸和一碟牛腸,食燒肉總是離不開會叫杯野飲,今次我地同樣叫 カルピスソーダ,每杯¥180


 
起初諗住牛腸會比較肥膩,但結果又唔係喎,相反盛合中的牛腩反而比較肥膩,搞到很快飽飽滯滯,D油滴落炭爐時搞到不知幾大火


我像小朋友一樣,愛吃香腸,好彩佢唔係比廚師腸比我


 
呢餐埋單盛為¥5270,餐後都差不多時間去會合朋友了,天黑又開始落大雨,我倆準時地等侯朋友,差不多21:00終於見到友人們了,他們剛去完貓車駅睇貓貓,我們一行5人馬上前往天狗居酒居飲飲食食,係日本與朋友相聚的感覺份外有趣,因大家自自然然便會交流下旅遊中的樂趣
 
今日是年初二,大家齊齊乾杯啦,係日本都拜個年先
雖然大家都唔肚餓,但少少地都要叫下野食的,味道其實比池袋那間較遜色, 不過大家志在聚會,掛住講D野都凍咗D









大家傾到成11點幾才走,但我地一樣不忘要去便利店買翻2杯布丁回酒店做甜品


沒有留言:

張貼留言