2013年2月5天閃遊大阪の城崎溫泉 (下)

Day 1 : 11-Feb-13 (Mon) 雨
約15:30便浸完柳湯就開始周圍行下，可惜今日成日落住時大時細的雨，影相都麻煩D，其實城崎的環境都OK架，感覺不錯也

不經不覺便行到菜果，既然今日賽果唔錯，所以一定要幫襯菜果，其實係香港上網睇到此店時，已甚有興趣品嚐，一於嘆杯先

選擇都幾多下，單味又有，混溝又有，連帶點酒精成份又有，睇到我眼花花，開頭諗住要桃味，又見到芒果就心思思

最後我要了一杯芒果乳酪(¥400)，而M君就要了一杯芒果cocktail(¥600)，味道都OK，即叫即整，那時店舖只得一個男生，是一腳踢，期間不斷都有人進來幫襯，雖然未至於排長龍，但他也很熱誠地做過不停

 坐底飲完後繼續逛逛，見有土產店都會入去八一八

 

本應原先諗住會浸2間外湯的，但為了奪牌，都花了一粒鐘，而且又想多點時間逛城崎，所以途中經過其他的外湯時，都沒有打算再浸了，仲要留時間去食野呢

 

 雖然肚子不是餓，但點都敵不過日本小食，呢間城崎スイーツChaya亦是mark低咗想食的其中一間

我倆都打算share食，所以買了一個但馬牛飽(¥300)和一個城崎蟹飽(¥300)

係食物櫃中見到當店名物『米粉チーズ ケーキ』，有3種口味，樣子不錯，吸引了我腦內的食物神經線，不停震動其他神經線，發出電波就決定買一盒3件裝，只售¥650，即每款味可以各一，打算外賣在車上再慢慢品嚐，滿足下自己

沿途也間中見到有蟹出售，不過我地當然無買，只是望下算了

 

當行到接近16:50時，就要快快返回JR城崎駅了，因我們打算想搭17:02的班次返回大阪，而這天在城崎的日歸行程已接受尾聲，一個既美好又開心的行程總要說聲再見了，個人對城崎溫泉的感覺不錯也，如能配合到藍天白雲就更好

17:02 (城崎溫泉) → 19:47 (大阪) 【特急こうのとり24号】Pass包

 回程時亦是選擇坐自由席，並沒有補錢坐指定席，又好彩地座位多的是，很容易就搵到位坐定定等開車，開車不久已急不及待想食『米粉チーズ ケーキ』，拿拿臨幹掉它吧

唔錯唔錯，食落帶點凍冰冰，個人覺得好好食，怪不知做當店名物，呢¥650食到3件咁好味的餅，絕對值回票價，滿足完之後就大覺睡了，車程要2個鐘之多才到大阪，好容易入睡啊

19:47返到大阪後，第一時間在駅Locker取回行李，下個目的地當然是到酒店取房，到達心斎橋當然是晚上，下圖酒店相只是第2朝早影的

 

大阪 → 心斎橋【御堂筋線】¥230

 

今次package是包4晚酒店，我地就是住ハートンホテル南船埸的Twins Room，酒店離心斎橋不算太遠，所以晚餐自然會係心斎橋搵食

 

酒店設備及整潔度都OK，幾鍾意佢有張梳化，可以放野亦可以坐，另外只要自行帶個router就可以係房內免費wifi上網，每晚總會花點時間上上網，亦方便我用whatsapp相約朋友明晚於心斎橋食宵夜

 我是遊客，來個例影

 轉眼間已是21:50，要快快搵食先，係心斎橋附近見到つきじ喜代村壽司，時間已不早，就一於在此食壽司啦

 進店後即有位，一次過點了多款壽司，還每人叫了一碗湯

 

 我就當然要有蟹這一碗，夠氣勢

 

 M君就叫了有魚這一款，其實湯底都係同一味道，只是另加你想要的料落湯

 

 我倆唔客氣開餐了

 

 

味道普普通通，感覺還好像退步了，沒有回味的感覺，不過我都沒有期望是好好味，所以又不算是好失望，呢餐埋單是¥6213

雖然剛食完晚餐，但係途中又見到有章魚丸，就算唔餓也要吃，話晒第一天到日本，要尋回多些味雷的感覺，這間本家 日本一 大たこ賣的是¥360有6粒

新鮮滾熱辣呀，內裡的餡都大大粒，同香港果D差好差

 

返到酒店樓下梗係要去便利店買甜品啦，例行公事一樣，但M君心急到居然未影相已食咗，12點幾喇，要快快去睡，好好地休息繼續第2天的行程呀