2013年2月5天閃遊大阪の到著篇

時間 : 2013年2月11日至 2月15日(共5天)
人物 : M 君 + 紅米奇
特約演員 : 馬騮仔 (大佬) + 幼稚仔 + 滑滑 + 粒粒

起航航班 : 國泰航空 CX2506 【02:40 (HK) → 07:05 (関西空港)】

回程航班 : 國泰航空 CX2565 【22:10 (関西空港) → 01:30 (HK)】

Package 包4晚酒店 Twin Room (ハートンホテル南船場) : $8,599 per one ($8,599 X 2 = $ 17,198)

Tax : $941 X 2 = $1,882

額外住宿 : ¥31,900 和室1泊2食 (2人價) (有馬温泉旅館 兵衛向陽閣)
預先在港購買的車票如下:
1) JR Kansai Wide Area Pass (4 days) : ¥7,000 per one
($588 X 2 = $1,176)

2) 大阪市營一日乖車劵 (地下鉄/New Tram/Bus) : $47 per one
($47 X 2 = $94)


Day 1 : 11-Feb-13 (Mon) 雨
大年初一返家拜年後就隨即返回自己家執行李，以往我多數早一日已準備好晒，但今次連plan行程都懶洋洋，是是但但啦，有D野仲係諗住去到先算，代表我不想去日本嗎? 這絕對不是，我不知幾想去，頭頭尾尾相隔2年喎，就算只得貴價套票都照殺，5日都好過無，睇黎懶散地plan行程只剩下一個主要原因，好簡單咪就係二個字『懶惰』，所以部份就推個波比M君，呵呵呵!!!

好Lu，大阪5日閃遊的時刻開始了，今次因是搭零晨加班機，所以接近11:00便到達機場，以為初一應該都幾多人出發去旅行，但眼見機場人流與以往差不多啫，都唔算多人，襯無乜人check in時，馬騮兵團仲唔出黎影張團體相咩，留住這一刻

幼稚仔 : 搞乜鬼張相曚咗架? 梗係生疏耐無影相就出事

 我地check in時接近是無人的，所以很快很順利便搞掂

 

入咗去當然要去The Travelers' Lounge，記住係近Gate 1那個Lounge，幸好今次我地登機是Gate 4，嘩! 即近到飛起，係Lounge坐到夠鐘登機時才行去都得，今次Lounge就比較多人，入去登記時都要排幾個人，以往登記是接近唔使排隊架，入面的座位亦餘下不多

呢次好彩D，唔似得之前只係得剩餘無幾的選擇，今次連湯都有呀，一於在此享用一個免費晚餐，其實當宵夜就差不多，因為成11:45才食，唔緊要啦，橫掂晚上只食了蘿蔔糕啫，總之食得落

係Lounge坐到夠鐘就行去登機了，大阪已多年沒有踏足過，期待的5天旅程就開始了，我地心裡還希望可以提早降落関西空港就好了，因時間會直接影響今日的行程

預定的行程
我們最遲要搭到08:48出大阪，希望夠時間駁得到轉搭10:11去城崎溫泉，因由大阪去城崎溫泉要差不多2個半鐘架，去到城崎已是12:49, 如遲一班車便會成14:54先去到，我地又唔係入住城崎溫泉的旅館，只是玩日歸而已，因此如搭不到10:11去城崎溫泉的話，我地便會改明天才去，但當然好想今日去啦，因搭了通宵機，橫掂有成2個半鐘車程，用來叉電瞓一瞓至好不過，加埋浸一浸應該醒晒

當大家坐定定，飛機又穩定時，空姐開始派餐lu，今次又有新體驗，連飲咩都唔洗問，劃一全部維他檸檬茶，我收到時覺得好搞笑，維他檸檬茶!!! 好地道喎，不過你想飲其他野都可以問空姐攞，我都見有人問攞橙汁，還有榮X出品的炸角仔，好應節，派角仔時都同我講新年快樂，我一向都唔多欣賞飛機餐，雖然今次零晨機的食物組合又幾搞鬼，不過恕我都係唔懂欣賞

機師控制時間好準，差不多原定時間抵達，我地想早到的希望幻滅了，但起碼無遲都好，只是貪心想早啊! 好彩晨早劃到較前的坐位(31D、31E)，正是商務艙後的第2行，所以好快落到機，腳加快行速向入境處進發，Oh! 長長人龍呀，好彩他們都開了不少counter，算是排了幾個字就過了關，行李亦很順利攞了

好彩一切順利，時間掌握中，還諗住可以搭早2班車去大阪，呢刻第一件任務當然是換Pass，這是預早在港買定，在東瀛X買有折扣，到達日本時憑兌換証換正式JR Kansai Wide Area Pass (4days) 便可，點知入到JR綠色窗口時見要排幾個人，而且每個都唔快搞掂，咬呀! 望下錶知道早唔到2班車了

當輪到我地換Pass時，職員好像不太懂有此Pass，要左搵左搵資料來看，莫非實在太少人用此Pass嗎? 對他來說很陌生般，因此便花了點時間才搞掂，起初打算順便補錢搭指定席去城崎溫泉，因為今日是日本的公眾假期，我怕自由席多人無位坐，同職員溝通一大輪後，職員示意2人要補 ¥4,8XX，即比多幾佰蚊港紙(我孤寒)，最後我決定坐自由席把啦，寧願早點去排自由席隊博有位坐，最終我地只搭到08:33去大阪，比預期的08:48早咗一班車，不過早到都好過早唔到

 08:33 (関西空港) → 09:45 (大阪) 【JR関西空港快速】Pass包

 馬騮兵團又出來見光了，坐穩車出發去玩了

 順利到大阪後，要趕10:11去城崎溫泉呢，等埋我地呀 .............