2014年北海道+東京の雪旅 (Day 3 : 阿寒湖冬華美 / 宿 : 花ゆう香)

Day 3 : 2-Feb-14 (日) 年初三

約15:15已直接車到去阿寒の森鶴雅リゾート花ゆう香門口，此酒店規模及名氣係阿寒湖區當然不大，它是鶴雅姊妹館，我地唔揀住鶴雅的原因很簡單，咪因為數年前已住過，而鄙の座咁貴又唔捨得住

一開始辦理check in手續時已發生一件晴天霹靂的事，就是預約今晚dinner buffet time時居然話早輪Full，只得19:30呢個時段，再三查問都是No，我唔晴天霹靂就假，花火時間是20:10，仲有表演睇呢，食得黎邊睇到，唔通唔食去睇咩，咁又唔得，OMG真失察，無諗過要預早留buffet位嘛，其實又係嘅，大部份個個都想食早輪晚餐後去睇『阿寒湖冬華美』啦

我check in的時間又不算遲，睇怕其他人都是一早預約留定位，鬼叫自己懶plan，諗少一樣就出事了，職員知我夾不到時間去睇『阿寒湖冬華美』的花火，她便對我說用膳地方可睇到花火的，我都無辦法啦，只好接受，應該話無得唔接受，好彩心情只是down咗數分鐘，算是天意吧! 一於一邊食buffet一邊睇花火

Hotel : 阿寒の森鶴雅リゾート花ゆう香
Price  : ¥21000 (2人 : 1 泊2食)【湖側】和室10畳（禁煙）【Jalan book】

從窗口望出可看見湖上提供的活動，今日天氣比較陰暗，陽光欠奉了，否則應該更清晰

放好行李後馬上行去阿寒湖玩釣魚先，這行程是數年前定下來的，當年一心去玩釣魚等等湖上活動，可惜預到大風雪，接送巴士要繞道而行，車程比原定時間多出2小時以上，當年到達鶴雅時已是黃昏，所以甚麼活動也沒有玩，連愛奴族部落也沒有行，多麼的殘念

所以今次北海道之旅要再訪阿寒湖，誓要完成當年的任務，第一項任務是釣魚

因只是我有興趣玩，所以在售票處只付了¥1500(1人費用)，有一張摺凳仔、一包魚餌和一支魚竿

我倆就帶著釣魚三寶就行去帳篷，因範圍內都沒有工作人員指示，我仲以為係自動波自行進入一個帳篷就可以開始釣魚，正當我有一隻腳踏入帳篷時，就有位工作人員便走過來示以叫我去另一個大帳篷，原來我呢D散客仔是去大帳篷與其他散客一齊排排坐來釣，不是獨立帳篷

我16:00進入大帳篷時無乜人，工作人員還幫我整上魚餌，而且示範埋比我睇點釣，跟住佢就走開了，可惜我資質有限，見他很快很易就釣到，我就論論盡盡，好彩都有M君幫下手，起初唔多釣到的，但重復又重復之後，開始掌握到少少，開始有幾條收穫，我都滿意了，因目的不是想食魚仔，只是享樂過程，所以見16:40都唔早喎，仲唔走就行唔到愛奴族部落就揼心喇，決定走人啦，手上餘下的魚餌就轉送給坐在旁邊的台灣人

我們連去食炸魚都沒有，直接交還釣具後就急急去行愛奴族部落，行街shopping緊要過食魚嘛

很多的木刻製品，都幾靚下，一場咁遠來到點可以唔買作留念，我們分別在唔同舖頭都有買

真係好像天光行到天黑般，我都幾鍾意行愛奴族部落，感覺良好

邊行邊下雪

18:00行完街就返酒店浸個溫泉先，因19:30才食buffet，大部份人都去了食事處或鶴雅那邊浸，所以我包場浸咁制， 雖然花ゆう香是有車接送來回鶴雅享用其溫泉， 而花ゆう香只有內湯，但我都沒有打算專登去鶴雅浸，一來我當年住鶴雅時已浸過，二來就是變相花ゆう香比較少人浸，我反而可以舒舒服服寧靜地去享受浸溫泉

當接近19:30 dinner time時，果然已無乜人在食事處，大部份已外出睇『阿寒湖冬華美』，但當時窗口位的食客還未離座，因我要求坐窗口位(睇花火嘛)，所以要等一陣才有窗口位，無所謂啦，橫掂都唔趕時間

終於可以開餐了，選擇種類當然一定比鶴雅少

牛扒又算OK喎，所以唔只食一份

約20:10窗外響起來，花火出動了，我坐窗口位雖然看到花火，但發現餐廳旁對出亦可看到，那麼我冒寒走出去影花火，其後便返回座位繼續食，每次來阿寒總有少許遺憾，今次未能在會場睇表演，難道又要來多次嗎? 不過相信再來機會不大了

   

返回房間已鋪好一切，再浸多一回便乖乖睡覺