2015年7月台北為食の旅 (Day 1 : 西門町、饒河夜市)

時間 : 2015年7月1日至7月4日(共4天)
人物 : M君 + 紅米奇
特約演員 : 幼稚仔
起航航班 : 中華航空CI642【11:40 (HK) → 13:20 (TPE)】
回程航班 : 中華航空CI915【14:35 (TPE) → 16:20 (HK)】
Expedia (Air-Ticket + Hotel + Tax) : $4,241 (2人)

前言
無啦啦飛台北，就是短短假期又想出下阜，點解唔係去日本嘅，皆因得4天時間，而去台北的總旅費平得多，日本梗係留翻有長假期才去:D

話說我上次去台灣已是十多年前的事，仲係和好友跟團去玩，不是和M君去(細細聲講呀):-$，所以今次都是初次自由行去台灣，訂好機票酒店後，借了本舊年的台灣旅遊書，自己再上網做下功課，很快就搞掂行程了，因台北實在很易去，唔難plan，我倆亦只想簡單短遊一下，不錯的選擇啊:)，上網簽証又方便快捷

小小基本景點 + 夜市 + 邊行邊食 = 台北為食の旅

Day 1 : 2015年7月1日(三)
目的地 : 西門町、饒河夜市

台北為食の旅啟動了:-bd，今次短遊就只帶幼稚仔去，開心得佢幾得戚只得佢有份去:))

慣例我倆都3個鐘前到機場，第一次搭華航，嘩!咁多人排隊(O晒咀):-O，今日7月1日假期真是多人外遊

幸好我都有一個習慣會預早網上check in，其中一個原因是經Expedia 買此套票所提供的華航機票是要24小時才可劃位，好彩預早網上check in，所以我倆便可到自助登記出boarding pass，然後排另一邊是供持boarding pass者寄行李，那條隊就短得多

搞掂晒過關手續就自不然要去近Gate 1那邊的Plaza Premium Lounge

選擇不多，次次都是食呢D的早餐，就會對自己講免費餐仲想點:P，不過如果係Gate 4X那邊登機的話，果邊像好些呢，可惜我多數是呢邊登機呢#-o

吓...delay ，一等又等，12:25才登機

飛機餐...無期望無要求，就是這樣

抵達台北桃園機場後便行去入境過關，途中有兌換外幣的銀行，此刻又提起我傷心事:((，事前已知用銀聯咭係台灣櫃員機取台幣的兌換率是靚過用現金兌換，本身有恒生銀行提款咭，咭上有銀聯標誌，此咭是saving a/c，事前亦已在港櫃員機啟動了海外提款功能，在台灣每次提取台幣會收手續費，不過計埋這手續費，個rate都好過現金兌換，記住銀聯咭只是得saving a/c那種，不是銀聯信用咭，如用銀聯信用咭提台幣的話，便有其他費用要收，這便不著數

甚麼搞掂都好，晴天霹靂的事發生了:-O，是我居然唔記得帶此恒生咭#-o，唉!自責一輪後都無辦法架，好彩我都帶定足夠港幣，所以見無乜人兌換台幣時，就先唱錢然後再去過關，當我唱好錢後，原來後面已排起人龍:-O

過關都算快，其實排隊是打晒蛇餅，突然關員叫一埋人去尖峰counter，我倆就是這埋人其中二個;;)，所以用了約15分鐘就過咗關:D

我地今次住的酒店位於行天宮，所以揀了搭國光客運的1841號巴士，單程是$83，每15分鐘一班，很方便，所以不需等很久便有車，行李放在車箱中，司機會給一張行李證，下車時給司機便可取回行李

在站前有職員指示協助的，3號位就是我倆要搭的1841號

我搭的巴士十分整潔，有點像日本巴士;)，但曾聽過國光巴士很殘舊，當時我見前往台北車站的車確有點舊，好多人喜歡住台北車站或西門町的酒店，可能實在太多人搭了，相反我卻揀了非旺區的酒店

接近約1小時的車程後終於在『民權松江路口』下車，然後行去酒店，途中經過行天宮站，再向前行約1分鐘便是這次旅程連住3天的酒店

這間酒店叫Check Inn，個名都幾搞笑又好記，是人介紹的，都是近年才開始營業，所以頗新，房間整潔，空間足夠(個人標準)，服務有禮，位置地點十分近行天宮站，出入如搭捷運就十分便利，樣樣都不錯，但唯一大缺點出來了，就是隔音差，頭2晚都好靜，可能未有人住，但第3晚可能開始有人入住隔離房，在晚上時間很清楚聽到對方沖涼的水管聲，幸好他們都不是夜鬼，很快沖完涼都無聲了，否則我真係有聲瞓唔到

需要拍房咭才可按到自己入住的樓層

今次住12樓

由於窗外對面是商業大廈，可望到辦公室內，同樣地他們都可以望到客房，所以日間會落半簾

順帶一提房間有很多插頭，很方便

在地下設有大磅，想知行李有無過重，一磅便知，不錯的設備，同時好像在3樓有洗衣和乾衣機，不過我不需用，所以無影相

話說在港如持入台証、 e-ticket & 酒店入住証明去位於尖沙咀的台灣觀光協會可免費取悠遊咭，仲諗住可慳翻按金有張悠遊咭，但可惜又無時間去攞，而咁啱上網得知呢期出張Doraemon款，咁橫掂都要買，梗係買張特別款啦，我都是在酒店附近的7仔買，順便增值埋

悠遊咭像八達通一樣咁方便，搭捷運又有折，第一站馬上搭去西門町，一個繁榮的地方，初來台北點都要來看看，原本計劃可以在此下午茶，但經華航delay變了黃昏餐8-|

第一站 : 阿宗麵線
2個字...『失望』，全個旅程最敗筆的食店，但又好多人食喎，恕我不識貨，呢間仲係我話要食:-<

第二站 : 老天祿滷味
4個字...『不過不失』，其實十幾年前跟團來時已食過，覺得當時好食D

第三站 : 三吉外賣
2個字...『不錯』，叫了炭燒雞肶、鴨舌和香腸，其中鴨舌偏辣，而炭燒雞肶和香腸都不錯，如炭燒雞肶再熱多點就更好

第四站 : 西門町芒果冰
2個字...『不錯』，食完辣辣的鴨舌後，很想快快降溫，台灣芒果真是好味，食完後透心涼

第五站 : 牛店
2個字...『幻覺』，一開始先飲啖湯，好好味呀，好香牛味，但再食麵就麻麻，麵質唔QQ，而牛筋，好腍，所以好似幾好又好似一般，我只想飲晒D湯

呢間都好多人食，幸好我地早幾分鐘到，因我地之後無耐已掛出售完牌 ，做埋幾組客就關門

第六站 : 成都楊桃冰
2個字...『普通』，我叫的楊桃冰還可以，好睇你鍾唔鍾意酸酸甜甜的味，飲冰的味道我就OK，但碗中有舊調製過的楊桃就麻麻地，而M君的波羅冰就話完全唔得

西門町的食程已完成，馬上轉地頭，正是相當受歡迎寬饒河夜市

 

第七站 : 福州世祖胡椒餅
2個字...『普通』，可能是天氣太熱，個餅又好熱，邊滴汗邊噴晒煙咁食，又或者有期望去食就自然有少許出入，不是超好味那種

第八站 : 阿文冬瓜茶
2個字...『好飲』，在炎熱天氣下，飲呢杯冬瓜茶舒服不少

 

第九站 : 陳董藥燉
2個字...『不錯』，只叫了一碗藥燉排骨，湯好有藥味，但又幾甜，感覺好補，幾好飲，啱晒我，而排骨就比較鞋，不食也吧，重點係飲湯，M君都覺好飲，但他飲完體內就更發熱 :D

第十站 : 敲好喝西瓜汁
2個字...『好飲』，可能太熱關係，當買完第一時間一人兩啖已無咗大半，此時才記得未影相喎:))

此日為食の旅已完成，臨尾買了些沖泡式黑糖塊，因時間不早，要返回酒店休息了，明日才是正式開始觀光行程<:-P