2014年北海道+東京の雪旅 (Day 1: 東京到著)

終於儲夠60000里數可以換2張機票了:-bd，諗都唔使諗一定換去日本啦，仲要想換大年初一出發tim，超搶手旺季啊，而個人心理上總覺得換機票去北海道是最抵，雖然曾到訪北海道4次，但對於我的婆仔數理論，最終都決定再訪北海道:D，目的是簡單走一轉，不需花心機去plan，從未如此唔洗點用時間去plan就起行，結果...... 遊記中分解

時間 : 2014年1月31日至 2月8日(共9天)

人物 : M 君 + 紅米奇

特約演員 : 馬騮仔 (大佬) + 幼稚仔 +新仔

起航航班 : 國泰航空 CX504 【09:05 (HK) → 14:05 (成田空港)】

內陸航班 : 日本航空 JL1147 【13:15 (羽田空港) → 14:50 (釧路空港)】

內陸航班 : 日本航空 JL522【18:00 (新千歲空港) → 19:40 (羽田空港)】

回程航班 : 國泰航空 CX501 【10:35 (成田空港) → 15:00 (HK)】

機票 : 免費(Asiamiles換)

Tax : $855 X 2 = $1,710

Day 1 : 31-Jan-14 (五) 年初一
早機就要晨早起身搭機場巴士，原本諗住行去巴士總站搭的，幸好行到樓下附近時剛有架通宵機場巴士到喎，馬上趕上車。慳翻唔少腳力，可見我地plan行程hea到連機場巴士都無研究晨早班次，似乎一早就有個好開始

因人人都話年初一好多人架，所以到達機場後預咗會多人，但結果又比預期中少喎，都唔洗點排隊就很快搞掂Check in，一切都很順利，順提是又好彩劃到連座位，因是換機票關係，只可48小時前才可劃位，呢D旺季諗住咁遲劃位都未必有連座位，正當夠48小時那刻我馬上劃位，好彩仲見有連座，但數量很小，手震震用九秒九劃咗先 ，雖然連座是廁所前一行，但好過無啦

辦好check in後直接過關了，第一時間醫肚先，以往會去Gate 1那個The Travelers' Lounge，但現時知呢個Lounge超多人去，所以今次轉架步，寧願行遠D去Gate 45那邊個Plaza Premium Lounge，不過又咁啱今次登機閘口是Gate 49，變相反而係就腳tim

呢邊呢個Lounge果然少人得多，不過食物選擇相對是少些，在此悠悠閒閒等登機

不知不覺夠鐘登機了

例行的飛機餐按時送上，隨後揀翻套戲來睇睇先，揀了未睇過的盲探

終於到成田了，過關排隊的人又不算多，約15-20分鐘已順利過關，反而行李尚未碌到出來，唯有等行李

得知成田剛有個臨時位可索取NTT free wifi card，索取方法很簡單，持有passport和填張表就OK，但只限指定某些位置才有free wifi，用唔用得著就見仁見智了

取完free wifi card後就直接搭Skyliner去上野
成田空港→京成上野 (¥2400/per one)

今日會先留東京住一晚，明日才正式開始北海道之旅，今次頭尾留東京的住宿揀了上野區，這是我地第一次住上野，因為唔想走時又大喼細喼拖去搭車轉車等，所以一於試下住上野，仲要住近京成上野tim，對於我地來回成田機場來說簡直方便到暈

前往上野途中就開始發現唔上心plan行程的問題出現了，我居然咁大頭蝦無print酒店地圖 ，即時O咀，唯有用我僅餘的記憶力大約知酒店位置，好彩揀呢間酒店是貪佢夠近京成上野，所以唔難搵

Hotel : 上野きぬやホテル (上野Kinuya Hotel)

Price : ¥11,200 (Twins Room)

酒店位置真是很方便，比想像中還近 ，於京成上野駅內出閘右手邊的樓級上去過一條小馬路就到，即『池ノ端口』的出口，但可惜右邊只得樓級，左邊才有自動電梯，變了都要攞住行李行樓級 ，唔想行樓級都得，便要在左邊自動電梯上地面兜翻去後面，雖然都不是太遠，但講直接近的話，我地都揀行樓級

酒店屬細規模而且頗舊，但算整潔，上到走廊時竟然覺得自己高咗喎 ，乜個門口咁矮嘅，不過面積算ok，很寬敞一定唔係，但我地的房間可在走廊位打開到個喼有餘，房內有free wifi，但繁忙時間就比較弱，個人認為這間酒店最大優點是位置，以出入成田機場來計真是好方便，走時攞住重重的行李都唔辛苦，最大缺點是浴室，沖涼的龍頭不太好用

取了房安頓好後就先去上野アメ横醫肚了，話晒都未食lunch，所以見到生果都忍唔住買支來食

起初大家都無乜心水食乜，而我一向是麵痴 ，但見M君對魚生飯好似有興趣喎，我就建議各自食完再會合吧，但最終M君放棄魚生飯來陪我一起食拉麵  ，剛路經此店就食佢啦

食完拉麵後就出發去今日唯一的行程 …….. Tokyo Sky Tree