2010年2月東北尋冰覓湯の旅 (Day 12~最終回)

Day 12 :  23-Feb-10 (二)

以下行程發生時間由10:15至 20:30
今日已是旅程的last day，同之前的十天分別係唔洗早起身，因為朝早都無溫泉浸，所以今日成10:15先離開酒店，其實最近呢幾次同M君去日本都有一個習慣，就是會安排數小時是自由行，然後約定某個鐘數再會合，呢數小時就是各自發揮小宇宙時間，各自偷歡，呢part唔錯架，當會合時總會見到對方大袋細袋，然後又會講翻各自偷歡期間的所見所聞，呢個環節不錯也，本來打算同M君一起食完食餐先分道揚鑣，點知搞來搞去都唔知食乜好，最後決定不如各自搞掂，拿拿臨各自出發啦，咪浪費咗 shopping time，我地得呢半日shopping要爭分奪秒架

同M君道別後，我首先去了原宿打個轉先，10:40到達原宿，橫掂d舖頭都未開齊，我都係先醫肚，簡簡單單就食Lotteria

係原宿都有些少收穫，然後馬上轉陣地去了池袋，由於只顧行行行、睇睇睇、買買買，所以係無乜影相的，買到咁上下又攰攰地，見14:00都差不多係醫肚了，一個人食乜好呢? 左諗右諗之下，就想食我最鍾意的食物之一……就是拉麵喇，突然又想起好耐都無食過麺創房無敵家，一於決定食無敵家當lunch

一如以往都要排一陣隊，不過係日本我絕不介意排隊，坐低後不久拉麵就送上來，糖心蛋又靚又好味，湯底算OK，同之前的水準沒有大退步，都能滿足我呢個麵怪，但總是覺得第一次食是最好味，不過呢個是一個慣性感覺，往往第一次食是最有新鮮感

食飽後就再殺去新宿，今日短短半日行咗3個shopping point應該行到腳仔軟先啱，但有野睇有野買的話，雙腳係麻木架，行多多都得望下錶差不多要同M君會合了，突然又想起飛機餐的味道，咪喇!寧願自己買定野食打底好d，我就去新宿中村屋買咖喱包

我地約了係新宿 Kent Hotel等，哈! 居然我早到過M君，莫非佢買大咗，不久就見到佢出現了，嘩! 點解佢咁多袋架，好似收穫豐富過我呀，今回好似輸咗比佢tim，怪不知佢遲到又面帶笑容行埋黎啦

我地將所有戰利品收好落喼之後，又係時間去機場，心情馬上跌watt，再加上好重的行李簡直攞你命此刻M君又發揮壯男精神，大部份行李由佢攞，我只係攞一個背囊和一個旅行袋，相比M君攞成4件野的話，佢辛苦好多，謝謝你付出的一切，抵你買多2袋野

終於到達羽田空港了，係JAL櫃位又是長長的人龍，但未埋櫃位前有幾部自助check in機，亦有位日航職員在旁協助旅客用這部機，人龍是必須經這部機才可繼續埋櫃位寄行李，即是想旅客先用自助機check in，然後在櫃位只辦寄行李手續，好似應該係快d，但可惜大部份人都唔多識用部機，所以那位日航職員忙過不停地協助旅客

順利辦好晒手續過埋關了，每次呢個過程都悶悶不樂，乜又要返港呀，係未夠鐘登機時，我地就先進行開餐，得中村屋的咖喱包又點夠呢，所以係附近睇下有咩食? 結果係無咩選擇，得一間有三文治賣，咁都要買啦，因為應該都好食過飛機餐

咬一啖食下咖喱包先，買果時已是凍冰冰，唔知係咪呢個原因，味道麻麻啫，又不值專登去食

 

由期待至實行的東北の旅，終於完滿結束了，呢次旅程令我嚐試了不少經歷，當中以M君搵翻失而復得的銀包嘅經歷最為深刻難忘，想重溫請按 『2010年2月東北尋冰覓湯の旅 (Day 2~驚恐2.5小時)』，我地就一d都唔想重溫呢類經歷，不過卻令我地更加感受到當地人的友善和純樸的性格

一個12天的旅程居然要用半年時間才完成整個遊記，應該是我寫得最慢的一次，希望無悶親各方親朋戚友

是日搜羅的蓋印

 

 

~完 ~

 

^ 多謝收看 ^

\^o^/