2010年2月東北尋冰覓湯の旅 (Day 1~松島海岸)

Day 1 : 12-Feb-10 (Fri)

 

資料網
‧日本國家旅遊局

‧瑞巌寺

‧松島さかな市場

‧松島島巡り観光船企業組合

‧松島観光協会

發生時由13:33至23:30

 

話咁快係【仙台】搭左35分鐘就到【松島海岸】，一踏出車駅先吸啖新鮮空氣，個人都醒d，駅並不大，門口左邊便是Locker位置，我地第一步當然係去今晚入住的松島センチュリーホテル放低個背囊，前往酒店沿途見到些食店、紀念品店和一些賣燒蠔的舖頭，個靈魂已想逐一光顧，不過肉體係好理性地繼續向酒店方向行，無有怕的，放低背囊後我一定與它們打個招呼

 

 

除了留意到燒蠔食店外，我都會望下其他建築物架，不經不覺原來『伊達政宗歷史館』就在眼前，不過並沒有打算參觀，另外途中還見到今日重點景點的巡島乘船處，陣間就可以同海鷗大戰……期待

  

 

終於到了松島センチュリーホテル，酒店是面向松島海景，真高興有海景住啊，酒店只得4層高，幸好我地安排入住2樓，算是沒有被建築物阻擋，如1樓就難講，房間都是一般和洋室的size，不過附設了一個露台，行出露台睇下風景都幾正，環境不錯呢

 

趁未夠鐘搭巡島遊時，當然先去五大堂、瑞巌寺走轉先，話晒都係松島名勝之一，感覺普普通通，影完相就繼續向前走，其實松島不算大，我地所去的地方全是徒步可到，不需搭任何交通工具，徒步都幾好架，一邊行可以一邊睇野買野食野

 

離開五大堂就掃街呀，所謂掃街咪係食野law，一於去翻之前經過的食店買燒蠔食，望一望價錢是￥200一隻，個人又唔覺好貴播，不過隻蠔的size很mini，我地稍後5分鐘就有得食啦，等等等……燒好 lu，我地急不及待把它一口吞下去，嘩! 咪講笑，不是誇張，真係好鮮，好甜好甜好鬼甜，唔好睇佢細細仔，但美味程度係我意料之外，沒有期望下果然會有驚喜，它是我食過最好食的蠔

所謂食開就停不了，途中又見到有間門口有牛舌鏝頭賣，我地又買來試下啦，味道一般，沒甚麼特別，不過勝在熱辣辣

由於在港搵料時見有網友話外邊店舖買蝦條餵海鷗會平d，所以我地買了一包￥150，跟住就直接去巡島乘船，因預先係網上予約有10% off (coupon)，我又點會放過呢d著數呢，去到售票處比張印有我個名的discount紙給職員，同時付上￥1,260 (原價￥1,400) 就成功取票了，原來還會送一包細蝦條架，早知自己唔洗買啦

今日我揀了15:00搭『仁王丸』，離開船時間尚有時間，我倆便隨意影下相先，仲影下泊在旁邊的其他船隻，留意到每當有船開出時，海鷗就像收到order要開工一樣，自動圍住個船頭飛

 

終於夠鐘上船喇，入到去時見到有職員企係上層入口處，如要坐上層要額外付上￥600，當時我地都諗緊究竟比唔比錢坐上層好呢，諗左幾秒後就決定……..比啦，結果當我地回岸時就肯定這個決定是絕對正確，當行到上層時，發覺坐上層全是日本人，得我同M君是外地人咋，上層並不滿座，所以我地2人可獨佔一張可坐4-6人的枱，鬆動也，不過查實我地走出去船頭餵海鷗的時間仲多過坐係室內

 

 

當『仁王丸』開出不久時，我倆諗緊開包大包蝦條定開佢送果包細ge呢? 結果就決定開大包啦，橫掂專登買來餵吖嘛，不過到最後其實應該用佢送果包都ok，估唔到大包蝦條比海鷗食，自己反而係食細包，咩世界

 

攞住蝦條就拿拿臨出船頭同海鷗們混戰，我起初都有點怕，怕牠咬到我的手指會痛，所以都帶上手套，點知發覺帶手套攞蝦條有點不便，而且當成功左第一次與海鷗交流後，發覺無我想像中的恐懼感，所以馬上除下手套，同牠們來個直接接觸，唔知係咪搭15:00較遲的班次問題，牠們好像不太餓，之前已開餐食飽左，見佢地開頭並不雀躍，好彩經過我地誠意權權不放棄咁伸手不放低，終於打動左佢地呀，開始接二連三的搶食，搞到我地想捕捉餵食那一刻的相都唔易，唯有用連環快拍，點都中一張掛

除了我倆外，間中只有幾個日本人出來睇下風景和餵一陣海鷗，睇怕最爛玩都只得我地，無法啦，香港係石屎森林，當外遊都好想relax下，呢個藉口應該講得通掛

整個餵海鷗過程比我想像中無咁驚，其實應該話完全唔驚至真，就算偶然被牠咬到手指，我都不覺好痛和怕，所以玩得頗開心，其實航行中當經過某景點，船內都會廣播介紹，可惜呢我倆個旅客醉翁之意只在餵海鷗，忽略了廣播介紹，不過我地都把握時機影翻數張島上的相架

 

 

不經不覺差不多1小時的巡島遊就結束了，我和M君便落樓梯往下層準備離開，點知……..嘩嘩嘩!!! 咪嚇我，原來下層坐到人山人海，勁多人，應該唔少香港人tim，心諗會唔會係團呢，總之好嚇人，估唔到下層原來咁爆，同上層相比，上層寧靜舒適得多，餵海鷗都自由自在，所以今次比多￥600坐上層，對個人來說絕對絕對值得，相反又証明好多人都不願意付額外錢坐上層，不過不知這情況是否常見，點都好，慶幸上左上層坐，這樣便沒有影響與海鷗同樂之趣巡島遊之後，我地下個景點是瑞嚴寺，途中又見到有燒蠔，當然唔會走雞啦，呢隻都是￥200，又是等數分鐘先可以食左佢，鮮與甜一樣有，但之前食果間的味道略勝一籌

 

食完燒蠔後便進入瑞嚴寺了，只是影些相兜個圈而已，到此一遊啦，沒有甚麼感覺

遊畢完瑞嚴寺後又比我地見到有間店舖有咖喱蠔包賣，好吸引呢，馬上買一個來食下先，個胃同肚都好像無時停，鬼叫佢地個主人咁鍾意係日本食野咩，今次我地share食一個包架，M君食左一半先，然後餘下一半就是我的，係呢個時間我發現我蠢左，因為當M君食到中間最後一啖時，我眼白白見到包中間的蠔被他撕左出來，佢當然豪不客氣食埋落口，我馬上投訴，咁我果半個包咪無蠔，剩係得翻d咖喱，我只食左半個沒有蠔的咖喱蠔包，咁我都唔知應否稱它為『咖喱蠔包』，可能『咖喱包』會貼切d

 

滿足完我地的食欲後，又向橋進發，其實條橋好近Hotel，天色都開始灰暗了，我地行埋條橋就大功告成今日的景點，一條紅色的橋橫誇湖中，來回慢慢行過橋後便直接返酒店

 

 

在房間的露台欣賞了一陣松島海景後，我地馬上去開始浸今次東北之旅的第一個溫泉先

19:00於酒店餐廳開始食半自助式的晚餐，何為半自助式呢，因為除了每人有一set指定食物外，另外還設有沙律吧、牛舌、宮崎牛、天婦羅都是放題，我地當然唔會放過任何牛類，可惜比預期差dd，牛舌還可以，但宮崎牛就略為不軟身，不是件件容易咬開，基本牛的香味是有，但整體就一般了，所以是師傅手勢不佳定係肉質貨色不佳呢? 食了數件宮崎牛後，我地之後都只是encore牛舌吧

 

食飽飽之後梗係返房稍作休息，Tatami都已鋪好，抖一陣當然再浸多一轉先晚睡，不過又估不到經過昨晚零晨機後，今日玩足成日都唔覺好倦播，日遊呢劑特效葯又真係好掂呢，能解除好多心病架，心病還需心葯醫，所以唔去日本點得呢

 

住宿感覺

起初選擇松島酒店有2個選擇，一是大部份人都熟識的ホテル松島大観荘，二是呢間松島センチュリーホテル，其實ホテル松島大観荘有Buffet食頗為吸引，而且好像吸引不少港人(或自由行)及團體入住，經過考慮後，我地寧願試下呢間，名氣都不俗架，而且都有半自助式的Buffet，經入住後，呢間果然不算多人，令感覺比較寧靜舒服，而且不論服務、房間、環境、溫泉都合格，唯獨是晚餐因為有點失望而扣左少少分，總括平均算ok

是日搜羅的蓋印