2010年2月東北尋冰覓湯の旅 (Day 5~青森)

Day 5 : 16-Feb-10 (二)

酒店 : 東横イン 弘前駅前
房價 : ￥6,825/Twins Room

資料網
‧青森県土産観光情報
‧青森市 Aomori City
‧ねぶたの里 青森ねぶた祭観光施設
‧Festival City AUGA
‧道の駅「なみおか」アップルヒル
‧十和田湖→青森 (JR Bus Time)
‧青森Taxi
‧酸ヶ湯

乘車紀錄
(1) 十和田湖 (08:30)【JR Bus みずうみ701号】→ 青森 (12:25) JR全日本Pass
(2) 青森 (16:23)【JR奧羽本線】→ 弘前 (17:10) JR全日本Pass

以下行程發生時間由07:30至17:10
由於賑山亭的風呂確實吸引唔到我，所以倒不如瞓多一粒鐘把啦，今日朝食又是和式為主，幸好都有煙肉蛋，我將煙肉蛋撈左落碗飯到食，唔! 咁就好好味同好快食完碗飯喇，整個朝食最開心就是居然有個啫喱甜品，仲係山形名果的 Lafrance(ラ・フランス)  
 

早餐過後就搭8:30的JR bus向青森邁進，其實之前我plan此行是十和田湖→酸ヶ湯→青森，諗住浸一浸千人風呂嘛，當時JR bus時間是配合到架，不過當時的時間表是秋夏季，因還未出冬季時間表，唉! 點知就是冬季問題呀，當JR bus有冬季時間表時，班次明顯疏落了，破壞了我的計劃啊，又唔想為左浸酸ケ湯而焗住留幾個鐘，咁唯有放棄酸ケ湯温泉啦，最多留下次，所以冬季搭車真是要留意班次呀

由十和田湖搭去青森約4小時，都不是短程巴士，佔了一個早上時間，但我很奇怪架，係一個旅程中，我又幾鍾意搭幾小時的巴士(傻傻地)，咁當然係一兩程就ok，唔係成日咁搭啦，因為我都幾enjoy這段車程架，間中又必定有停車處比你落車去個廁所鬆一鬆，仲可以買下野食或紀念品，係日本搭巴士又唔會暈車浪，又可以睇風景，又可以瞓覺，當幾個鐘後到達目的地更是開心，這純粹個人喜好，如有類同，實屬巧合，那麼你又像我一樣嗎?08:30呢班車又是不多人搭，我地又可以各自坐窗口位，而今次第一個停車處是蔦溫泉，一落車就見到旅館，周邊地方唔大，我地落車鬆一鬆和影幾張相就返回巴士繼續向前行了

當10:50又在第二個停車處，呢次係酸ケ湯呀，心想: 原本落車後我係去浸千人風呂架，現在變左休息處tim，不過係酸ケ湯做休息處又幾好播，雖則我無得浸啫，但都可以係酸ケ湯周圍逛下，最正就是有印呀，又可以比我蓋印，仲有紀念品賣，我又有收穫呢，話時話，一落車已聞到一陣陣的硫磺味，有機會真係好想見識下酸ケ湯温泉，日帰費用是(大人 : 500円)

酸ケ湯温泉除了﹝早上8:00-9:00﹞和﹝晚上9:00-10:00﹞屬於女性專用外，其餘時間都是混浴，不過聽聞池邊都有牌分『男』、『女』，當然中間沒有野相隔，即是可以互望，有些人會自動浸『男』或『女』，但亦可能看不到牌就是但浸一個，不過話行到室內的視野十分蒙，太大蒸氣，女人們如果想浸混浴又無帶大毛巾包身的話，仲有一個選擇，就係賣紀念品的舖頭買件灰色的浴衣，有埋吊帶架，很安全唔會驚上落水甩毛巾，不過要￥1,000就好似貴左d

離開酸ヶ湯後，不經不覺12:25就到達青森，原本第一個目的地係Festival City AUGA食海鮮丼，不過呢幾日都食左唔少海鮮類，所以改變下計劃先得，另外我地當然記得係商場搵Locker，正! 只需￥100，點都平過JR駅果d啦

我地係海鮮市場逛左陣，就決定散買些野食啦，我揀了一隻阿波尾鳥的雞翼，嘩! 十分好味呀，好耐無食過咁好食的雞翼，好入味，我見d日本嬸嬸買好多隻架，應該當餸，M君就買左隻雞脾，佢一樣話好好味，好有雞味，另外仲買左一件薯餅，呢3樣加埋就係青森的第一餐了，不錯的選擇啊，我地買完後就係海鮮市場內搵張凳坐低食，其實有時唔需要下下入舖頭坐低食的

係海鮮市場見到有些土產店，點忍得住唔買翻D手信呢，蘋果糖、蘋果片、甚至蘋果汁，樣樣都同蘋果有關，通通都係親友指定的手信呀，鬼叫佢地知道我地去東北咩，親友問東北即係邊度呀? 我一講『青森』，他們已不用繼續聽其他地方，直接說我要蘋果或其製成品，可想而知青森蘋果有幾大吸引力

 

肚子充左小量電後，我地順便逛逛上層商場，咁就出事呀，行左一陣就被d鞋和衫吸引住，d衫又唔算貴播，起碼平東京一截，發 lu 發 lu，唔洗我講就知發生咩事啦，錶都唔望係咁逛，但又唔敢買咁多，因為今日先 Day 5，但唔買點對得住自己呢，少少地獎勵下自己啦，當我買得七七八八時，就輪到M君發作，佢見到間￥100 shop，佢買咩? 就是毛巾，吓! 乜毛巾都要係日本買，佢話係日本買係好用d喎，其實又咪同我一樣….『祟日』，總之係日本買野都好用d

 
我倆適量出血後，望下錶發覺已是15:00，真是快樂不知時日過，本應諗住係青森逗留至14:00，然後搭JR去弘前，仲可以參觀弘前城，哈哈! 現在買野都買到過晒鐘數，我和M君異口同聲都認為買野重要，寧願搭遲幾班車去弘前啦，shopping完當然要醫醫肚，買野都好花體力架，左搵右搵之下就幫襯一間我地從未光顧過的 大戸屋

食完主菜後點都要食翻個甜品先，果然唔錯，好味

馬騮兵團唔好話我地唔照顧你地呀，M君叫果個甜品有香蕉架，開心死佢地

係搭JR前，我地就係生果檔買左2個蘋果，1個王林和1個金星，2個都係諗住帶回港食的

金星價格最貴當然由馬騮仔保管，唔係點做大佬呀王林就交由臘腸保管，因為臘腸係馬騮仔副手富士就交由卜卜保管，因為剩翻呢個，佢無得揀

 
既然青森用多左時間，咁我地都唔想咁遲先去弘前，睇下JR時間表有一班16:23去弘前喎，急急腳仲唔趕車咩，因為miss左呢班車就要等一個鐘頭先有下一班架，Turbo腳又要開呀，以為入左閘上埋條樓梯就到月台上車，我已出盡力9秒9跑上樓梯架，點知上到樓梯仲要走一段路先係上車處，我當時真的跑到要死，唔好話跑吖，連行都無力，但亦知道班車差不多開出了，鬼叫日本d車好準時咩，我曾有1秒諗過不如算啦，下一班就下一班，但M君仍然向前苦跑喎，同埋我確實都唔想搭遅一班，好啦! 跑死就跑死，繼續向前衝呀，同時見到有數名日本少女同我地一樣跑緊去追車，情景都好搞笑，日本少女(著短裙架)跑最前，M君跑中間，唔洗問我一定係包尾啦，情況就好像M君追住架妹，我追住M君，唔怪得知M君跑得咁快，不過好彩有架妹帶頭咋，唔係邊得追到車呀，幸好最後都上到車，不過我跑到連野都講唔到，扯晒蝦呀，好彩無斷氣，真係從未追車追到咁ge款架

抖順條氣就期待下個景點 .......... 弘前

是日搜羅的蓋印